As 15 parroquias que conforman o amplo termo municipal de Pontevedra non só gozan dun grande interese paisaxístico, senón que tamén destacan polos importantes monumentos e as valiosas mostras de arquitectura popular que é mester visitar. Unhas destacan polos seus restos prehistóricos (como Campañó e Salcedo); outras, polas súas magníficas igrexas (en Marcón, Mourente ou A Canicouva); aqueloutras teñen sona polos acontecementos históricos que viviron (como Ponte Sampaio), ou ben polos seus impoñentes pazos (Lourizán). Tamén hai parroquias que destacan pola beleza da súa natureza e da súa paisaxe (Alba, Cerponzóns, Verducido, Bora, Santo André e Santa María de Xeve) ou polas súas populares romarías (Lérez e Tomeza).
