As persoas interesadas poderán a partir de mañá, 15 de xuño, e até o 15 de xullo, remitir as súas peticións de xeito telemático na web https://feirafranca.pontevedra.gal/, ou de xeito presencial na oficina da Feira Franca situada no edificio Teatro Principal, entrada polo lateral, no cuarto andar
A Feira Franca, Festa de Interese Turístico Galego, será celebrada na cidade de Pontevedra entre o 4 e o 5 de setembro, seguindo a tradición de ocupar o primeiro fin de semana do nomeado mes.
Desta volta, o prazo para presentar solicitudes para hostalaría, mercado e/ou xantares e ceas estará aberto entre o 15 de xuño e o 15 de xullo de 2026, ámbolos dous incluídos. A oficina, ten xa abertas as súas portas.
As solicitudes poderán ser presentadas de dúas formas posíbeis: de xeito telemático, a través da web oficial https://feirafranca.pontevedra.gal/, nos formularios que se habilitarán na sección correspondente; ou de xeito presencial na nomeada oficina da Feira Franca, que estará situada no edificio do Teatro Principal, entrándose polo lateral do mesmo, no cuarto andar, tal e como o ano pasado.
O horario de atención ao público será de 10 a 14 horas, ademais do teléfono 986 86 05 87 e o enderezo electrónico feirafranca@pontevedra.gal.
O programa será presentado no seu momento, ao tempo que a temática deste 2026.
A Feira Franca é, dende hai dúas décadas, unha cita ineludíbel para as xentes de Pontevedra e os milleiros de visitantes que veñen gozar dela, procedentes de todos os recunchos do país e máis alá das nosas fronteiras; un peche apoteósico dos días de verán creado por e para a xente; unha viaxe ao século XV participada por toda unha cidade; unha vivencia única habitada por artesáns, canteiros, ferreiros, palilleiras, cesteiros, oleiros, redeiras, carpinteiros, músicas, xograres, campesiños, toneleiros, artistas, comerciantes, damas e cabaleiros que nos achegan o tempo do privilexio concedido a Pontevedra polo rei Henrique IV, no ano 1467, en virtude do cal se autorizaba a celebración dun mercado libre de impostos dun mes de duración.
A Feira Franca, que ten lugar na zona monumental da capital do Lérez todos os anos na primeira fin de semana de setembro, toma forma dende o ano 2000 coa organización de diversas actividades lúdicas de raigame histórica, que van dende a representación do transporte do viño ou o imperdíbel torneo medieval, ata os espectáculos de cetraría, tiro con arco, esgrima ou as exhibicións de música e danza que enfeitizan as xornadas do venres a partir do serán e mais de todo o sábado. Pero, sobre todo, o que fai especial e distinta esta festa medieval, declarada Festa de Interese Turístico pola Xunta de Galicia en 2013, son os milleiros de persoas que se visten de época para xantaren nas prazas e rúas, en mesas montadas e decoradas por elas mesmas, seguindo as pertinentes normas estéticas e utilizando tan só materiais existentes na segunda metade do século XV, conformando unha obra deleitosa na que o público é tamén actor sobre o escenario da cidade vella.