A concelleira de Deportes, Anabel Gulías, presenciará ás 17:00 horas o encontro inaugural desta nova pista, que supuxo un investimento de preto de 10.000 euros.
Con este campo, o Concello amplía a rede de superficies deportivas de petanca até as 21.
A concelleira de Deportes de Pontevedra, Anabel Gulías, acudirá esta tarde ás 17:00 horas á Praza da Cítara, no barrio da Parda, para presenciar o primeiro partido que se disputará na nova pista de petanca. Este campo, rematado nestes días, xa abriu a mediados desta semana para que os participantes da liga puideran adestrar nel antes da estrea competitiva de hoxe.
A adecuación destas instalacións foi adxudicada á empresa Garocaprim e contou cun orzamento de 9.776,80 euros. Para a execución da pista, os operarios escavaron parte da zona verde da praza, creando así o terreo de terra e area necesario para a práctica deste deporte. Con esta nova infraestrutura, a zona da Parda e Pontevedra Leste suma a súa segunda pista (xunto coa da rúa dos Soutos), ampliando a extensa rede municipal que xa conta con 21 campos.
Ademais, están en carteira o novo campo de petanca de Acevedo, na parroquia de Ponte Sampaio, que se executará á par que o novo local social, e un novo campo na parroquia de Salcedo, ao carón da Casa Verde. Ampliando así estas superficies deportivas a 23.
O partido inaugural desta tarde enmárcase na Liga de Petanca de Pontevedra que está promovida pola Agrupación de petanqueiros/as de Pontevedra e polo Concello e está formada por 16 clubs, neste momento.
A concelleira de Deportes, Anabel Gulías, quere pór en valor esta disciplina porque vai moito máis alá da actividade física xa que “é unha ferramenta fundamental para o encontro xeneracional e fomenta o benestar da veciñanza”. Así mesmo, lembra que con este tipo de infraestruturas e eventos, Pontevedra “coida as súas tradicións” mentres promove un deporte activo en todos os barrios e parroquias do municipio.
| Localización | Campo / Lugar específico |
| O Burgo | Traseira do pavillón |
| A Alameda | Montero Ríos |
| A Parda | Praza dos soutos |
| Praza da cítara | |
| Monte Porreiro | Mirador |
| Praza de Europa | |
| Salcedo | Centro sur |
| A Igrexa (comunidade de montes) | |
| Os Campos | Os campos |
| Mourente | Os areás |
| Santa Mª de Xeve | Ao carón do centro social |
| Santo André de Xeve | No parque da Bouza |
| Verducido | (comunidade de montes) |
| Estribela | Praza |
| Marcón | Campo da Festa |
| Bora | Salgueiral |
| Campañó | Cabaleiro |
| Ponte Sampaio | – |
| Mourente | Cons |
| Campolongo | Detrás da residencia de maiores |
| Fracha | Parque forestal |