A Dirección Xeral de Fondos Europeos ratifica a axuda para a estratexia EDIL, que transformará Monte Porreiro, A Parda, Valdecorvos e A Seca.
O concelleiro de Economía, Raimundo González, salienta que esta inxección económica supón unha “transformación radical” e estrutural para a calidade de vida destas zonas.
O Concello de Pontevedra recibiu onte a confirmación definitiva da concesión das axudas europeas para o desenvolvemento da súa estratexia EDIL (Estratexia de Desenvolvemento Integrado Local). A Dirección Xeral de Fondos Europeos resolveu de xeito definitivo a convocatoria, asignando a Pontevedra unha axuda do Fondo Europeo de Desenvolvemento Rexional (FEDER) de 8.730.304,00 euros.
A resolución definitiva fixa unha taxa de cofinanciamento do 60% por parte de Europa. A estrutura económica do plan queda ratificada do seguinte xeito:
- Achega FEDER: 8.730.304 euros.
- Achega do Concello de Pontevedra: 5.820.202 euros.
- Investimento total mobilizado: 14.550.506 euros.
O proxecto de Pontevedra obtivo a cualificación de “Seleccionado” cunha puntuación total de 76,5 puntos, consolidando o financiamento para actuacións clave no desenvolvemento urbano sostible.
O concelleiro de Economía e responsable de Fondos Europeos, Raimundo González Carballo, celebrou a resolución definitiva xa que a chegada destes fondos “vai supor a transformación radical” dos barrios de Monte Porreiro, A Seca-Valdecorvos e A Parda. Ademais, o Concello conta con proxectos maduros o que facilitará cumprir coa obriga de ter executado e pagado o 20% da concesión a mediados de 2027.
Os fondos destinaranse a proxectos estratéxicos de rexeneración urbana e dotación de servizos, e o Goberno local garante que serán executados todos independente da procedencia dos fondos:
- Monte Porreiro: As actuacións inclúen a construción dun novo pavillón de tenis de mesa cunha cuberta verde que funcionará como praza pública, a renovación do campo de fútbol e rugby, a rehabilitación integral do centro sociocultural con nova aula TIC e a reforma das rúas Alemaña, Irlanda, Luxemburgo e Reino Unido.
- A Parda: Financiarase o gran parque urbano de máis de 34.000 metros cadrados, unha obra actualmente en execución que dotará ao barrio dun gran pulmón verde.
- Valdecorvos: Crearase un parque inundable como solución baseada na natureza para como medida paliativa dos asolagamentos na rúa Fernando Olmedo e gañar espazo verde.
- A Seca: Urbanizarase un espazo público de centralidade situado xunto á vía do ferrocarril.
- Smart City: O plan inclúe tamén partidas para a administración dixital e a modernización tecnolóxica dos servizos municipais.