O alcalde, Miguel Anxo Fernández Lores, explicou que o proxecto abrangue a mellora de 191.304,5 metros cadrados de viarios en todo o municipio, uns 28 campos de fútbol
O alcalde de Pontevedra, Miguel Anxo Fernández Lores, anunciou hoxe o acordo tomado en Xunta de Goberno Local no que se deu luz verde á licitación do que cualificou como o maior contrato de rehabilitación de firmes da historia da cidade de Pontevedra.
O investimento total ascende a 5.494.531 euros, e a actuación supón unha mellora substancial de todo o concello. Esta licitación atende ao compromiso do actual mandato de dar especial relevancia ao mantemento de todos os espazos públicos e do mobiliario urbano.
Este ambicioso proxecto abrangue a rehabilitación de 191.304,5 metros cadrados (m²) de viarios en todo o concello. Para ilustrar a súa magnitude, o alcalde indicou que a superficie total a rehabilitar equivale a 28 campos de fútbol.
O contrato está dividido en catro lotes principais, asegurando unha atención integral a todas as zonas do municipio:
- Zona Urbana Centro (L1): 49.977,3 m² de actuación, cun investimento de 1.374.393 euros.
- Zona Urbana Exterior/Barrios (L2): 46.663,7 m² de actuación, cun investimento de 1.373.452 euros.
- Zona Urbana Parques Empresariais (L3): 43.806,3 m² de actuación, cun investimento de 1.372.605 euros. O alcalde resaltou especificamente que esta rehabilitación inclúe a totalidade dos viarios do Parque do Bao e do Parque do Campiño.
- Zona Non Urbana/Parroquias (L4): 50.857,2 m² de actuación, cun investimento de 1.374.081 euros.
Este contrato, incluído na modificación de crédito, inicia xa o seu proceso de licitación. Unha vez adxudicado, o prazo de execución estipulado é de seis meses e medio.