Trátase dun acordo coa Deputación de Pontevedra que aportará preto de 1.600.000 euros con cargo ao convenio anual dos 2.320.000 euros totais que se investirán no proxecto.
O alcalde, Miguel Anxo Fernández Lores, deu conta en rolda de prensa esta maña da Xunta de Goberno Local celebrada a primeira hora. Alén dos distintos asuntos incluídos na orde do día, o rexedor quixo poñer o foco na aprobación do convenio coa Deputación Provincial de Pontevedra destinado á renovación integral da iluminación na zona nordeste da cidade.
Lores destacou que este é o proxecto máis importante contratado para mudar a iluminación da Boa Vila, e ten como obxectivo completar a renovación de todas as rúas da área nordeste do centro urbano. O valor total deste proxecto ascende até os 2.320.991 euros, dos cales 1.601.948 euros serán aportados pola entidade provincial a través do convenio anual que manterá co Concello. O proxecto sairá a licitación nos vindeiros días.
A renovación abranguerá todas as luminarias da nomeada área, incluíndo o cambio de 39 cadros de luz. A actuación está deseñada baixo as máis estritas condicións técnicas en materia de eficiencia enerxética, empregando tecnoloxía LED, e suporá un antes e un despois se falamos de aforro enerxético e loita contra o cambio climático neste aspecto.
Ademais, o proxecto prevé un reforzo específico da iluminación en pasos de peóns e nos espazos e vías peonís. Así, procurarase mellorar a seguridade peonil, creando un espazo público máis seguro e unha mobilidade máis amable para todos e todas.
Unha vez finalizada esta intervención, quedará practicamente completado o cambio de iluminación en todo o municipio, agás partes do centro histórico e algunhas parroquias (como Tomeza e Salcedo), cuxa renovación se prevé para os próximos anos.
Renaturalización do Río dos Gafos
O alcalde tamén informou de que rematou o prazo de presentación de ofertas para o proxecto de renaturalización do Río dos Gafos. Presentáronse un total de seis empresas: Civis Global, San José, Ferrovial, Oreco-Balgón, e Vilor Infraestruturas SL, ademais da UTE formada por Casas e Covsa. O proxecto, que conta cun orzamento de 4,6 millóns de euros, supón unha mellora substancial para o barrio de Campolongo a través da plantación de novas árbores e a renaturalización do río.
Trátase dun proxecto sen precedentes en todo o Estado español, segundo as informacións remitidas pola Fundación de Biodiversidade.