As persoas ou entidades interesadas poderán presentar a súa comunicación até o vindeiro 17 de xuño.
O Concello de Pontevedra vén de publicar as normas para a celebración das fogueiras de San Xoán 2025 na noite do 23 de xuño. As persoas e entidades interesadas terán até as 13.00 horas do 17 de xuño para presentar a súa comunicación.
As normas para poder celebrar unha queima na noite de San Xoán son as seguintes:
- Presentación da comunicación ben electronicamente (sede.pontevedra.gal modelo 906) ben presencialmente, no Rexistro xeral do Concello ou na xefatura da Policía Local (nestes dous últimos casos en horario de 09.00 a 13.00 horas, antes das 13.00 horas do 17 de xuño. No documento que se deberá cubrir aportarán datos da persoa solicitante, situación exacta do predio, obriga de coñecer o teléfono do servizo de Bombeiros, Policía Local e Protección Civil, compromiso de ter un teléfono móbil en funcionamento e previa indicación do número na solicitude.
- As fogueiras terán que distar un mínimo de 15 metros ás edificacións e árbores. O diámetro máximo de zona de combustión da fogueira será de 4 metros de ancho cunha altura máxima de 2 metros. As persoas asistentes á fogueira non poderán concentrarse a unha distancia inferior á do ancho da fogueira respecto do perímetro exterior.
- Os materiais que se poderán empregar son: leña, pólas, toros de árbores e vellos materiais de madeira de calquera clase.
- Prohíbese calquera outro tipo de material, especialmente: os pneumáticos, plásticos, latas, botellas, materiais con PVC en xeral e similares, así como botar aerosois, aceites ou líquidos combustibles e/ou calquera substancia explosiva. Lémbrase que un bote de aerosol, aínda baleiro, pode orixinar unha explosión importante.
- Prohíbense as fogueiras baixo árbores, tendidos eléctricos, tendidos telefónicos, balcóns, terrazas, marquesiñas, etc.
- Prohíbese a realización de fogueiras sobre vías públicas pavimentadas, xardíns ou zonas verdes en xeral.
- A persoa solicitante terá que acatar as normas ou instrucións que poidan ditar os axentes dos Corpos da Policía Local ou Corpo de Bombeiros.