O alcalde, Miguel Anxo Fernández Lores, indicou que xa se tomaron medidas de seguridade, así como se encargou o estudo de detalle xunto coas primeiras actuacións para asegurar a fachada
O alcalde e portavoz do Goberno, Miguel Anxo Fernández Lores, compareceu esta mañá en rolda de prensa para dar conta da Xunta de Goberno Local celebrada a primeira hora. Alén dos distintos asuntos tratados na orde do día, o rexedor quixo informar dos traballos de emerxencia que se acometerán no Pazo da Cultura de xeito inminente.
Cómpre lembrar que a finais do pasado mes de marzo, detectouse a caída dunha lousa nunha das terrazas deste equipamento municipal. Trala primeira toma de medidas, Fernández Lores explicou que a inspección técnica realizada detectou máis pezas en risco de caída, polo que se ordenou o peche da terraza superior e a colocación dun valado provisional en distintas zonas do Pazo da Cultura.
O informe emitido pola oficina técnica de arquitectura recolle o encargo dun estudo de detalle da patoloxía e deseño de medidas preventivas a medio prazo, así como de medidas correctoras a longo prazo; ademais da colocación de protectores a nivel de rúa (xa se están instalando), a instalación dunha protección para a fachada a través dunha malla de triplo torsión do edificio principal, e a protección de malla para a cristaleira da sala VIP e para a cristaleira que dá a Policía Local.
Deste xeito, o Concello destinará algo máis de 380.000 euros para estas actuacións de emerxencia, sinalando que a preocupación «é máxima», e que se tomarán as medidas necesarias para garantir á seguridade deste espazo, á espera do que diga o estudo de detalle xa encargado.