Da man da Asociación Astronómica Sirio, está previsto na Ponte do Burgo un evento de observación pública do fenómeno que terá lugar o sábado 29 de marzo a partir das 10.40h con reparto de 2000 lentes, asesoramento e diversos métodos de observación dispoñibles.
Como preparación para este e próximos eclipses, terá lugar tamén coa colaboración de Sirio, unha reunión formativa o vindeiro martes 18 ás 18h. no Salón de Actos do Pazo da Cultura con inscrición previa no correo xuventude@pontevedra.gal
No fenómeno do 29 de marzo a porcentaxe de ocultación do Sol será de preto do 31% pero o 12 de agosto do 2026 será total en Galicia. Haberá tamén eclipses o 2 de agosto de 2027 cun 77’16% e o 26 de xaneiro de 2028 cun 72,16%
O concelleiro de Cultura e Xuventude, Demetrio Gómez, presentou esta mañá xunto a David Filgueira da Asociación Astronómica Sirio un plan elaborado conxuntamente para poder gozar dos eclipses de xeito seguro. “Son os nosos especialistas de Pontevedra en observación astronómica e con eles imos realizar unha actividade moi interesante de quecemento para o que se ven: o trío de eclipses que teremos nos próximos anos, un fenómeno astronómico que probablemente sexa único nas nosas vidas e, este ano o 29 de marzo hai un eclipse previo que vai ser tamén moi espectacular porque falamos de que se cubra case o 31% do sol. Para iso imos realizar con Sirio unha serie de actividades para entender por unha parte a importancia do que estamos vendo, que estamos observando cando ollamos cara o Sol estes días e tamén como debemos facelo porque non é unha activada esencialmente segura se non se fai seguindo as normas de seguranza”
Para fomentar que a poboación pontevedresa goce de xeito seguro dos fenómenos que están por vir, Demetrio anunciou unha xornada de formación, de carácter moi práctico e con inscrición necesaria en xuventude@pontevedra.gal xa que “está aberta a calquera persoa pero no caso de que teñamos máis demanda que prazas, imos priorizar a profesores e profesoras, directivos de ANPAS e profesionais de empresas de tempo de lecer, xa que iso nos permite despois chegar a moito máis público”
Esta formación terá lugar o próximo martes 18 ás 18h. no Salón de Actos do Pazo da Cultura, levada a cabo pola Asociación Sirio con 3 obxectivos:
- Coñecer ben os riscos que pode comportar ollar directamente cara ao sol/eclipse.
- Coñecer métodos de observación segura (INDIRECTA) – Aprender a construír un mecanismo de observación caseiro.
- Entender a importancia do evento astronómico deste ano e dos seguintes.
Posteriormente á formación, “o sábado 29 a partir das 10.15 da maña estaremos na Ponte do Burgo para observar o eclipse que se vai producir este ano. Grazas a Asociación Sirio imos contar alí cunha serie de materias que nos van permitir observar o eclipse, tanto directa como indirectamente, algún telescopio. Van asesorar tamén ás persoas que por alí se acheguen e ademais imos repartir 2000 lentes para observar alí. Escollemos a Ponte do Burgo porque o eclipse comeza sobre as 10.40h e a es hora o Sol está cara o leste de Pontevedra e ese e punto con mellor visibilidade. Se acompaña o tempo poderemos realizar esta actividade e se non, quedamos aprendidos para a seguinte, que será en agosto como vos vai indicar David”
Pola súa banda David Filgueira explicou o que sería un eclipse de Sol: “é a ocultación do Sol por parte da Lúa. Son astros que se están movendo e se dá de cando en vez cando está a Lúa nova cando hai un aliñamento case perfecto entre o tres sistemas: Sol, Terra e Lúa, de xeiro que a Lúa proxecta a súa sombra dobre unha zona determinada da Terra, que quedaría a escuras. O eclipse que temos o vindeiro 29 de marzo será parcial, vai ocultar aproximadamente o 31% do disco do Sol e imos empregalo como quecemento do trío de eclipses que veñen a partir do ano que vén. Especialmente importante vai a ser o eclipse do 2026 que vai ser case total en Pontevedra con máis do 99% do Sol oculto pola sombra da Lúa. Imos transmitirlle a xente cales son as maneiras de observalo de forma segura. Hai que tomar unhas precaucións e non empregar dispositivos como cristal afumado ou radiografías como antigamente. Imos aproveitar a charla do próximo martes 18 para explicar estes métodos correctos de observación, cales son os riscos e como evitalos”.
Tren de eclipses
2026 – 12 de agosto – Máximo do eclipse ás 18:30 – 99´58% – Total en Galiza
2027 – 2 de agosto – Máximo do eclipse ás 08:45 – 77’16% – Total no sur da Península
2028 – 26 de xaneiro – Máximo do eclipse ás 16:52 – 72´16% – Na Penísula, anular.