Manel Loureiro e os servizos de Aparello Dixestivo e Dermatoloxía do CHOP, premios Cidade de Pontevedra no 2024 

O xurado escolleu por consenso e unanimidade na categoría de persoa física ao escritor pontevedrés e ao conxunto de traballadores do Complexo Hospitalario Universitario de Pontevedra das nomeadas áreas, na categoría de persoa xurídica 

A Boa Vila homenaxeará o vindeiro 20 de xaneiro, San Sebastián, a Manel Loureiro e aos traballadores e traballadoras dos servizos de Dermatoloxía e Dixestivo do Complexo Hospitalario Universitario de Pontevedra (CHOP). Os premios Cidade de Pontevedra recaeron por unanimidade e consenso no escritor galego e a todos os sanitarios vinculados con estas áreas sanitarias en Pontevedra dentro do servizo público.

Na categoría de persoa física, Manel Loureiro foi escollido logo dun ano de enorme proxección internacional, logo de ser galardoado co Premio de Novela Fernando Lara 2024 e de vivir a estrea, en forma de película, a adaptación para Prime Video do seu libro Apocalipsis Z.

Na categoría de persoa xurídica, a candidatura dos traballadores e traballadoras dos servizos de Dermatoloxía e Aparello Dixestivo do Complexo Hospitalario Universitario de Pontevedra (CHOP) xerou consenso e unanimidade entre xurado logo de recibir os premios estatais Best in Class 2024,. O Servizo de Dixestivo do Complexo Hospitalario Universitario de Pontevedra foi recoñecido como o mellor de España nunha edición dos premios BIC na que se recibiron máis de 500 candidaturas para todas as categorías; namentres o servizo de Dermatoloxía do CHOP foi sinalado coma a mellor unidade de atención ao paciente nesta especialidade

Cómpre lembrar que o xurado dos premios Cidade de Pontevedra está integrado por representantes dos tres grupos políticos da corporación, así como de entidades veciñais, de sectores sociais e dos medios de comunicación.

A cerimonia de entrega dos premios Cidade de Pontevedra levarase a cabo o vindeiro luns día 20 na Casa Consistorial por vez primeira en máis de dúas décadas. 

Compartir publicación: