A edil de Deportes, Anabel Gulías, sinala a importante relación que a cidade mantén co piragüismo e lembra que Pontevedra conta con «referentes» neste eido «que a sitúan no mundo»
O Complexo Deportivo David Cal acollerá ao longo da fin semana esta cita deportiva, que funciona como antesala do Campionato de España Senior que se celebrará o mes que vén
A concelleira de Deportes, Anabel Gulías, acompañado do presidente da Federación Galega de Piragüismo, Fredi Bea, presentou esta mañá en rolda de prensa os Campionatos Galegos Pista Junior e Senior de Piragüismo que terán lugar esta fin de semana na cidade do Lérez.
«Pontevedra aspira a ser a capital do piragüismo e eventos coma este seguen afondando e continuando esa idea», indicou a edil. «Temos por diante grandes retos e citas que agardamos compartir no futuro próximo. A verdade que este tipo de campionatos tamén poñen en valor o traballo do CGTD e a importancia de contar cunha instalación como pode ser o Complexo Deportivo David Cal en Pontevedra».
Gulías destacou o piragüismo como unha disciplina deportiva na que «temos grandes referentes, tanto masculinos como femininos, poñendo ao deporte pontevedrés no mapa do mundo. É algo evidente, pero o deporte é vida, e fai sociedades mellores».
Pola súa banda, Bea lembrou que en todo o campionato español ningunha autonomía pode acoller este tipo de probas por separado, o que amosa a forza que ten o piragüismo na Galiza. «Desde primeira hora da mañá teremos espectáculo e teremos competición. É unha antesala do que está por vir a Pontevedra, un concello abandeirado e recoñecido a nivel mundial», indicou.
Até finais de ano, a Boa Vila acollerá o Campionato de España Senior, o Campionato de España de Dragón (200 e 500 metros) e o Campionato de España de Autonomías, o que traerá a máis dun milleiro de persoas até a cidade.
Nese sentido, a cita desta fin de semana prevé a chegada duns 500 padexeiros de todo o país, entre as dúas franxas de idade, a través de máis de 30 clubs.