O investimento do Concello en eficiencia enerxética e mellora lumínica é unha constante nos últimos anos. Até o de agora o investimento superou os 4,6 millóns de euros.
Busca reducir o consumo pero, sobre todo, paliar o cambio climático, rebaixar as emisións de CO2 á atmosfera e trasladar os estándares de calidade de vida do ámbito urbano ao rural.
Nas tres parroquias o Concello inviste 1,4 millóns de euros para cambiar 2.135 luminarias, liñas e cadros de mando.
O Concello de Pontevedra iniciou esta semana a instalación da nova iluminación led nas parroquias de Campañó, Alba e Cerponzóns, un proxecto de 1,4 millóns de euros de mellora lumínica e eficiencia enerxética. Traslada os estándares de calidade da cidade ao rural pontevedrés e supón un aforro de gasto enerxético de 958.999 kWh/ano (76%) e un aforro do consumo de 187.004 €/ano.
Este proxecto está subvencionado nun 80% do programa operativo FEDER (Fondo Europeo de Desenvolvemento Rexional) de crecemento sostible 2014-2020 para proxectos singulares de entidades locais que favorezan o paso a unha economía baixa en carbono. Esta axuda está xestionada no Goberno de España a través do IDAE (Instituto para la Diversificación y Ahorro de la Energía). A contía fnanciada é de 1.283.314,60 euros.
O investimento redunda nos obxectivos que persegue o Goberno local de máis verde (obxectivo medio ambiental) e redución da factura. As tres parroquias súmanse agora ao proxecto global do rural de mellora de eficiencia enerxética que xa está implantado en Ponte Sampaio, Canicouva, Bora, Lourizán, Santa María e Santo André de Xeve, Verducido, Marcón e Mourente. Polo de agora, o investimento superou os 4,6 millóns de euros.
Ao respecto das parroquias que agora inician o cambio de iluminación a led, o Concello adxudicou o proxecto á empresa Setga por 1.452.078,82 euros. Supón a substitución de 2.135 unidades de luminarias a led de 30W, a adecuación das liñas e a instalación de 35 novos cadrados de mando axustándose á normativa vixente.
Ademais, o contrato inclúe unha garantía de mantemento e conservación das instalacións de 5 anos. As características enerxéticas do proxecto son as seguintes:
| Antes | Agora | |
| UNIDADES | 2135 | 2135 |
| POTENCIA MEDIA | 140 W | 30 W LED |
| CONSUMO | 1.252.391 kWh/ano | 293.391 kWh/ano |
| GASTO ENERXÉTICO | 244.216 €/ano | 57.211 €/ano |
| AFORRO CONSUMO | 958.999 kWh/ano (76%) | |
| AFORRO ENERXÉTICO | 187.004 €/ano | |
| AFORRO MANTEMENTO | 60.847 €/ano | |
| AFORRO TOTAL | 247.852 €/ano | |
| AMORTIZACIÓN | 5,9 anos |
Das quince parroquias do rural, o Concello ten pendente actuar en Salcedo, Tomeza e unha parte de Lérez. Este última parroquia contratarase en breve.
Polo de agora o investimento global supera os 4,6 millóns de euros o que supón un aforro enerxético de 2.748.926,62 kWh/ano e un aforro de consumo de 398.394,63 euros.
| Proxecto | No luminarias | Aforro % | Aforro (kWh/ ano) | Aforro (euros) | Orzamento proxecto |
| Ponte Sampaio | 307 | 75 % | 168.256 | 28.000 | 140.000 |
| Canicouva, Acevedo, Rañadoiro | 460 | 78 % | 201.940 | 29.887,12 | 197.66 |
| Bora | 501 | 79 % | 216.000 | 31.968 | 209.856 |
| Lourizán | 438 | 76 % | 170.224,92 | 25.193,29 | 217.871 |
| Verducido, Santa María e Santo André de Xeve | 1887 | 68 % | 676.720,21 | 100.154,59 | 1.319.655 |
| Marcón e Mourente | 2070 | 69 % | 674.317,44 | 99.813,78 | 1.228.474,45 |
| Campañó, Cerponzóns e Alba | 2135 | 66 % | 641.368,05 | 83.377,85 | 1.325.738,22 |
| Total | 7.798 | 2.748.926,62 | 398.394,63 | 4.639.256,76 |
O cambio da tecnoloxía de iluminación “é unha loita contra o cambio climático”, explicou o alcalde Miguel Anxo Fernández Lores na visita que fixo este verán a Marcón para coñecer os novos cadros de mando da iluminación pública instalados no rural: modernos, estéticos, herméticos e moito máis prácticos que os actuais.
O alcalde tamén lembrou que “Pontevedra é un dos concellos máis avanzados neste eido, pois este cambio tamén se realizou en todas as vías de entrada á cidade, no barrio de Monte Porreiro e, neste ano, vai todo o sur da cidade; e no futuro seguiremos contribuíndo nesta loita contra o quecemento global e o cambio climático, que é unha das prioridades deste Concello, e que vai da man do modelo urbano, a redución de tráficos e as redución das emisións no centro da vila».
Segue o proceso de adxudicación aquí: