A campaña Volta ao Cole 2022 alivia o regreso ás aulas sorteando 28 vales de 70 euros entre os clientes do comercio local

O inminente inicio do curso escolar xa empeza a traer de cabeza a moitas familias, que xa comezan a planificar todo o necesario para o regreso dos rapaces ás aulas nun escenario de inflación. Axudar a paliar ese ‘baixón’ do fin das vacacións, animar este proceso de preparación para o arrinque das clases e aliviar un pouco a carteira dos clientes do comercio de proximidade son algúns dos principais obxectivos da agardada campaña Volta ao Cole 2022, impulsada pola Concellería de Promoción Económica e Turismo en colaboración coa firma Pontevedra Dixital.

A iniciativa, que estará activa entre os días 1 e 20 de setembro, terá entre os seus alicientes o sorteo de 28 vales de 70 euros para gastar integramente en algún dos aproximadamente 400 comercios locais con venda a pé de rúa participantes na mesma. De cara a promocionar a campaña, serán distribuídas 400 unidades de cartaces para que os establecementos a coloquen visibles nos escaparates e 40.000 boletos en paquetes de 100 unidades, que serán entregados en cada copra e depositados polos portadores nun buzón que quedará instalado na entrada principal do Mercado de Abastos.

A Praza Municipal foi precisamente o escenario elixido esta mañá pola concelleira de Promoción Económica e Turismo, Yoya Blanco, para presentar esta IV edición da Volta ao Cole, nun acto no que estivo acompañada pola coordinadora da campaña, Marga Caeiro, responsable de Pontevedra Dixital. Tal e como apuntou a edil socialista, “os pais e nais xa comezamos a mercar nestas datas material escolar, libros, uniformes, roupa e demais produtos para a volta ao cole, que xa está moi cerquiña”. “Quedan fóra da campaña as grandes cadeas, franquías, supermercados, froiterías, tendas de alimentación en xeral, profesionais da perruquería e da estética, empresas de servizos, hostalería e restauración e todos aqueles profesionais que non realicen venda de produtos”, matizou Blanco.

A concelleira animou á cidadanía pontevedresa “a mercar todos os seus produtos vitais para o comezo do cole no comercio local”, tendo a posibilidade de cubrir os boletos repartidos cos seus datos, depositalo no buzón da Praza, e de gañar “un dos vales de 70 euros que sortearemos no Mercado de Abastos o 21 de setembro (os gañadores serán comunicados por vía telefónica) e que poderán trocar integramente en calquera dos establecementos participantes ata o 20 de outubro de 2022”.

Tanto os cartaces promocionais como os boletos para o sorteo empezarán a repartirse entre os comercios a partir de mañá (os que non a reciban, poden solicitala no teléfono 630 65 04 15). O listado completo dos establecementos participantes será publicado na páxina web do Concello de Pontevedra (pontevedra.gal).

A promoción terá o seu ámbito nos pequenos establecementos comerciais do concello de Pontevedra, sempre e cando os mesmos se atopen abertos ao público e en normal funcionamento durante o período indicado. A campaña vai destinada ao comercio local en xeral con venda de produtos a pé de rúa, apostando non só polos sectores directamente vencellados coa volta o cole.