O concelleiro Raimundo González, encargado da xestión de Residuos urbanos mantivo esta mañá unha reunión con representantes do Centro Comercial Urbano Zona Monumental que se amosaron interesados en coñecer como será o sistema de tratamento e recollida dos residuos urbanos do centro histórico que propón o Goberno Local nos pregos do novo contrato de xestión dos residuos municipais.
O concelleiro explicoulles que, ao respecto da fracción comercial, manterase e reforzarase o sistema de recollida porta e porta vixente, tanto de cartón como de vidro. Ademais, está prevista a eliminación de todos os colectores do centro histórico, e o actual sistema estático substituirase por un móbil (de quita e pon), fundamentalmente de biorresiduos.
Os representantes de Zona Monumental quedaron satisfeitos coas explicacións do Goberno local e todos quedaron emprazados para manter próximas reunións en relación á aplicación da nova Lei de residuos.