O comercio local ponse romántico e convídanos a agasallar amor na nova campaña de San Valentín de Promoción Económica e #PonteLovers

• A iniciativa impulsada pola socialista Yoya Blanco convídanos a celebrar o Día dos Namorados “agasallando amor” e adquirindo os nosos regalos no comercio de proximidade
• Os clientes que merquen en 3 comercios adheridos á campaña poderán participar no sorteo de 20 vales de 75 € e os que o fagan en 4 realizar unha tirada nunha Ruleta do Amor chea de premios

San Valentín está á volta da esquina e o comercio local de Pontevedra volve sacar o seu lado máis romántico na nova campaña ‘Agasalla Amor’, impulsada pola Concellería de Promoción Económica e Turismo e a plataforma #PonteLovers cos obxectivos de incentivar as compras nos negocios de proximidade con motivo da celebración do Día dos Namorados e de compensar aos clientes que as realicen con suculentos premios. Así, a iniciativa traducirase nunha sinxela proposta, na que os pontevedreses que merquen os seus agasallos en tres establecementos adheridos á mesma terán a posibilidade de participar no sorteo de 20 vales por valor de 75 euros e os que o fagan en catro poderán realizar unha tirada nunha Ruleta do Amor con premios directos que se instalará o propio 14 de febreiro na Praza da Peregrina.

Para desenvolvela, a Concellería que dirixe a socialista Yoya Blanco distribuirá entre uns 400 negocios locais un pack formado por 12 corazóns e unha bolsa en vinilo para pegar nos seus escaparates e 40 tarxetas para entregar aos seus clientes, que a portarán para poder selala ao efectuar as súas compras de San Valentín na seguinte tenda. 

Aqueles clientes que xunten tres selos diferentes poderán participar no sorteo dos 20 vales depositando a tarxeta nun buzón que quedará situado na oficina de Turismo de Pontevedra (Praza de España) entre os días 4 e 13 de febreiro. Un cuarto selo, nunha pestana recortable, permitirá protagonizar unha tirada na ruleta que Promoción Económica ubicará o 14 de febreiro na Peregrina, nun stand de madeira ambientado no amor (que será substituído por unha ‘haima’ transparente en caso de precipitacións), podendo obter diversos premios directos: 25 vales de compra de 20 euros cada un, 250 rosas e 125 caixas de bombóns, que suman un valor total de 1.500 euros. A caixa de correos para depositar os tarxetóns tamén estará na Peregrina nesta xornada de San Valentín.

A campaña, que estará activa entre os días 4 e 14 de febreiro, vai dirixida e limitada ao comercio local do concello de Pontevedra (excluíndo supermercados, tendas de alimentación en xeral, grandes cadeas, franquías, empresas de servizos, perruquerías e bazares), e os vales de regalo só poderán trocarse no listado de establecementos comerciais que quedará visible na web municipal (pontevedra.gal). O martes 15 de febreiro celebrarase o sorteo dos 20 vales por valor de 75 euros ante a oficina de Turismo de Pontevedra.

Esta nova iniciativa de dinamización comercial foi presentada hoxe na Praza de España pola concelleira de Promoción Económica e Turismo, Yoya Blanco, nun acto no que estivo acompañada pola responsable da firma Pontevedra Dixital, Marga Caeiro (encargada do desenvolvemento da campaña), e no que a socialista estreou a Ruleta do Amor. A edil do PSOE convidou a toda a cidadanía “a celebrar o Día dos Namorados agasallando amor e mercando os mellores produtos de proximidade no noso comercio local”.

Listaxe de comercios adheridos