A Concellaría de limpeza viaria, xestionada polo concelleiro Raimundo González, continúa cos zafarranchos de limpeza nos barrios da cidade nesta semana. Rematará a limpeza na avenida do Uruguai iniciada a pasada semana. Nesta ocasión a limpeza será no lateral da ría. A limpeza na beirarrúa dos edificios realizouse a pasada semana.
Como vén sendo habitual, a limpeza farase na madrugada e na mañá do xoves. A zona de estacionamento estará valada dende o mércores pola tarde prohibindo o aparcamento nas horas anteriores aos traballos. Os vehículos que permanezan estacionados serán retirados polo guindastre municipal.
A limpeza farase con máquinas de varrer e limpadoras de auga a presión tanto na beirarrúa como na beiravía e na calzada, polo que a Concellaría solicita a colaboración de todos os veciños e veciñas e tamén dos condutores para garantir un bo resultado. Ao mesmo tempo, pide desculpas polos inconvenientes que poidan ocasionar estes labores habituais do Concello.