É unha proposta xestionada pola concelleira Anabel Gulías, que recibiu as casetas do anterior mandato, e reformulou a proposta orixinal de colocalos no Mercado de abastos polo volume de cada elemento.
Nos vindeiros meses farase unha intervención artística exterior nas casetas e a continuación dotarase de contido en colaboración coa facultade de Belas Artes.
A concelleira de Promoción económica, Anabel Gulías informou esta mañá que o seu departamento está a instalar catro casetas -similares ás de obra- en catro barrios da cidade para espallar por toda a cidade o futuro mercado de novos creadores e creadoras. Trátase da reformulación dun proxecto orixinalmente pensado para os baixos baleiros do Mercado de Abastos, que a concelleira retomou neste mandato pero coas casetas compradas cos fondos europeos EDUSI do anterior goberno.
A concelleira explicou que se trata dun proxecto adscrito á Estratexia de Desenvolvemento Urbano Sostible EDUSI Máis Modelo Pontevedra, financiada polos Fondos europeos Feder. « Unha parte central desta estratexia pivotaba sobre o equipamento do mercado de abastos » explicou Anabel Gulías. De feito, con esa financiación se acondicionou o primeiro andar da praza.
Esta actuación tiña unha segunda fase que era a creación dun mercado de novos creadores e creadoras que se ía a instalar nos baixos baleiros do mercado, complementando a Sétima Feira. Segundo explicou Anabel Gulías sería « unha feira de deseño na que os creadores e creadoras testarían o seu produto periodicamente, unha vez ao mes ou incluso menos ».
Rematado o mandato en 2019 a nova responsable da área « decidiu darlle outro enfoque. E dentro dese enfoque se iniciou a contratación de casetas -similares as que se poden atopar nunha obra- para instalar aí os creadores e as creadoras », indicaba a concelleira que recordou que o proceso de contratación rematouse ao final do pasado mandato no ano 2023.
As casetas teñen un volume de 6×4 metros o que non permite instalalos na fachada do mercado de abastos porque bloquearían a fachada principal e non se poderían desenvolver outras actividades como o mercadiño de antigüidades. Optouse por instalalos noutros puntos, a uns 15 minutos de distancia camiñando, en distintos barrios. Dous xa están instalados: na praza da ponte do Burgo e en Campolongo. Outros dous instalaranse nos vindeiros días: na praza de entronque coa ponte de Santiago e nas inmediacións da pasarela José Adrio.
A intención da Concellaría de Promoción económica é retomar a medida inicial: « crear ese mercado de novos e novas creadores e creadoras e facer unha rede de arte emerxente en Pontevedra », indicou Anabel Gulías. Desenvolverase en dúas fases: a primeira consiste no acondicionamento da parte exterior da caseta facendo unha decoración externa que evoque o contido das mesmas. « Para iso, o que vamos a facer son residencias artísticas na que catro artistas emerxentes da cidade e do entorno da cidade poidan facer ou pintar sobre a caseta e axeitala a realidade de cada barrio. Para esa decoración van a ter xuntanzas cos veciñas e veciños de cada barrio, van a estar durante un tempo testeando o barrio, vendo cales son os negocios, e definindo a idiosincrasia de cada barrio para poder facer esa decoración », manifestou a concelleira.
Esta fase comezará en canto estean instaladas as casetas da man do artista local Javier Carrera, membro de Reclamo estudio « xa ten moita experiencia neste caso nestas intervencións e tamén a persoa que vai a comisariar xunto con o profesorado da Facultade de Belas Artes o contido das caseta »
A segunda fase é dotar de contido as casetas, momento no que se recuperará o proxecto orixinal. Anabel Gulías informou que « estamos en contacto co profesorado de Belas Artes para que ese alumnado que quere probar a súa proposta, tanto comercial como artística, poida dispor das casetas e facer unha programación continua ».