Dende o pasado mes de xaneiro o Concello está a realizar en distintas podas en rúas, prazas, parques e colexios de todo o concello. O propósito é alongar a vida dos exemplares, evitar situacións de perigo coas súas pólas e mellorar a calidade de vida da veciñanza.
Estes traballos rematarán no mes de abril coa poda e limpeza das palmeiras da cidade.
O Concello de Pontevedra segue adiante coa campaña de podas que se están a realizar en distintas partes do Concello. A Concellaría de Servizos urbanos básicos, que dirixe Xaquín Moreda, responsable tamén dos parques e xardíns da cidade, trasladou esta mañá os traballos á praza de Galicia.
Estas podas forman parte dunha campaña de poda, limpeza e tala no arborado municipal, tanto do viario como do de parques, centros educativos e zonas naturais. Son labores de diversa consideración dende podas de seguridade, de formación, de control nos casos en que o tamaño da árbore exceda o espazo dispoñible a talas de exemplares enfermos ou mortos que por motivos de seguridade deben ser eliminados.
Os equipos de traballo están esta semana na praza de Galicia e continuarán a súa andaina por outras zonas da cidade xa que, ademais de garantir a vida dos exemplares, tamén se busca mellorar a calidade de vida dos residentes nestas rúas e prazas da cidade.
De feito, a necesidade de podar algúns exemplares que invadían as fiestras dos edificios era unha petición reiterada por parte da veciñanza de distintos barrios. Esta demanda levou ao concelleiro a priorizar estas intervencións dentro do departamento de parques e xardíns, xa que até o de agora íanse facendo traballos puntuais o que fixo medrar sen control algunhas especies.
A Concellaría de Servizos urbanos básicos realiza estas podas seguindo os criterios establecidos e aconsellados en arboricultura que recomendan facelas en casos imprescindibles de seguridade e policía para manter a saúde da árbore e conservala no mellor estado posible. Por esta razón, non se realizan podas de desmoche ou terciados -que se viñan realizando tradicionalmente en épocas anteriores-, xa que están totalmente desaconselladas ao provocar graves feridas aos exemplares permitindo a entrada de patóxenos, que a medio prazo dan lugar a árbores enfermas e máis perigosas de cara a seguridade dos cidadáns.
O tratamento das árbores urbanas vénse realizando ao longo do inverno e está previsto que rematen na primavera.
Algúns dos ámbitos nos que se está traballando ou xa se traballou son:
- Podas en centros educativos: CEIP A Xunqueira II, CEIP Xeve, Ceip Campañó, EEI Verducido, Ceip Marcos da Portela, CEIP Xeve, EEI Fina Casalderrei.
- Arborado viario: rúas Suecia, Italia, Bélxica, Alemaña en Monte Porreiro; laranxos da avd. de Marín; ficus na Poza dos Canos e Teixoeira; aligustres na rúa Camiño de Ferro e campus universitario; carpes en Eduardo Blanco Amor; freixos en Augusto García Sánchez; plátanos na marxe do río Lérez; pereiras na Praza das Regas; melias da rúa Cruz Vermella; liquidámbares da Rúa Espincelo…
- Podas en arborado de parques como a Xunqueira de Alba, o río Gafos, a Illa das Esculturas, o Parque Europa, Constitución, Marqués de Valterra, praza de Galicia, A Seta, Pasarón, Parque de Rosalía
Tamén se están a retirar exemplares con risco de caída na avd. de Bos Aires, no CEIP Xeve, urbanización dos Salgueiriños, praza da Constitución, parque da Seta, parque sobre os Gafos en Campolongo, xardíns fronte á Xunta de Galicia e residencia de maiores de Campolongo, entre outros.
A campaña rematará cara o mes de abril coa limpeza e poda das palmeiras da cidade, en concreto, da avenida de Vigo, Sagasta e Gutiérrez Mellado.
