Román Rodríguez, conselleiro de Cultura.
Luís López, presidente da Deputación de Pontevedra
Victor López, presidente da Culturgal
Natividade González, deputada de Cultura da Deputación da Coruña
Amigos e amigas, bo día e benvidos a unha nova edición da Culturgal, a Feira das Culturas Galegas
É un orgullo e unha sorte poder estar un ano máis aquí, amosando a potencia cultural de Galiza porque se de algo podemos presumir neste país é da calidade da nosa cultura.
A cultura galega ten amosado ao longo dos séculos a súa capacidade de resistencia, levantando a cabeza logo de períodos escuros e sombríos. Hoxendía, a profesionalización da creación, produción, distribución e comercialización do sector cultural dispón duns estándares destacados pero aínda precisa que as administracións siguamos a estar á altura.
No Concello de Pontevedra sabemos algo diso. E a nosa presenza hoxe aquí é a constatación da aposta municipal polo fomento e promoción da nosa cultura, unha entrega que nos fai estar orgullosos e orgullosas.
Alégrome de que Culturgal sexa unha cita regular do calendario pontevedrés e unha cita ineludible para boa parte do público galego que ama a cultura. Soamente temos que achegarnos ao Recinto Feiral para atoparnos a veciños, amigas, coñecidos… chegados de todos puntos do país nestes primeiros días de decembro, como se dunha tradición se tratase.
Nesta fin de semana pasarán por este espazo milleiros de galegos e galegas porque Culturgal é un lugar de encontro entre públicos, artistas, profesionais e institucións. Pero quixera destacar, especialmente, que nesta edición se potencie os encontros entre os profesionais e os distintos sectores culturais porque, de seguro, permitirán enriquecer o sector, afincalo e ser xerme de novos e fermosos proxectos. Parabéns por esta iniciativa.
Sen máis, remato felicitando a todo o equipo que fai posíbel o Culturgal: asociacións, entidades, creadoras, participantes, administracións… Sabendo que será un novo éxito. Inauguramos a Feira das Culturas galegas dándovos a benvida a Pontevedra.
Moitas grazas.