O edil responsábel de Parques e xardíns, Xaquín Moreda, lamentou os atrasos na súa construción, mais agarda que agora sexa usado por toda a veciñanza sendo «unha área de xogo mais tamén de estancia»
O parque infantil do Campo da Torre xa está aberto e a disposición de toda a veciñanza de San Roque. O novo espazo de xogo e estancia conta con diversos elementos para gozo da cativada, que poderá saltar e correr por eles ao longo dos vindeiros tempos.
O edil responsábel do servizo de Parques e xardíns, Xaquín Moreda, achegouse esta mañá até o parque infantil para comprobar o resultado final do proxecto e a súa apertura á cidadanía pontevedresa.
«Primeiramente pedímoslles desculpas aos veciños e veciñas polos atrasos na finalización do parque, mais houbo que ir resolvendo diversas cuestións técnicas que foron xurdindo», sinalou o edil. «Sexa como for, xa queda a disposición de toda a veciñanza, especialmente dos máis cativos, aínda que o parque tamén funcionará como zona de estancia para os adultos».
O concelleiro destacou o uso de materiais nobres como é a madeira para a construción deste novo espazo, que goza dunha textura e unhas cores moi agradábeis e integradas na zona. A reforma do parque do Campo da Torre contou cun orzamento próximo aos 75.000 euros.
Doutra banda, Moreda indicou que nun breve período de tempo tamén se procederá coa apertura do parque de auga situado no parque de Rosalía de Castro.