Xa está conclusa a obra civil e instalado o transformador eléctrico que dará servizo a esta zona da cidade e tamén ao colexio de Barcelos
O alcalde visitou esta mañá o desenvolvemento dos traballos e estivo acompañado polo concelleiro de Obras urbanas, César Mosquera.
O alcalde de Pontevedra, Miguel Anxo Fernández Lores visitou esta mañá o desenvolvemento das obras de reforma das beirarrúas e calzada da praza de Barcelos, que poderá estar rematada antes do verán. O alcalde estivo acompañado do concelleiro de obras urbanas, César Mosquera, do director xeral de Mobilidade, Jesús Gómez Viñas, e de responsables das empresas adxudicatarias E.C.Casas e Covsa.
Fernández Lores explicou que se trata dunha gran obra “necesaria” valorada en 2,1 millóns de euros que supón a substitución de todas as canalizacións dos servizos (abastecemento, saneamento, rede eléctrica, rede de telecomunicacións…), así como a ampliación das beirarrúas e a retirada dos lastros da calzada que se substituirán por asfalto. A obra leva certo atraso pola colocación de dous andamios noutros tantos edificios da praza que obrigou a traballar máis lentamente neses puntos e pola necesidade de que non chova para poder empregar materiais como o formigón nas beirarrúas.
Dentro da obra está incluído o traslado do transformador de Fenosa situado no colexio Barcelos. O alcalde informou que a obra civil xa está rematada e a instalación do novo transformador colocado, que está á espera de permisos para que Fenosa poida realizar o cableado necesario para a súa posta en funcionamento. A retirada do transformador do centro de ensino era unha demanda histórica da comunidade educativa de Barcelos.
O alcalde tamén explicou que a actuación no perímetro da praza queda pendente da parte lindeira co muro de Santa Clara “porque non sabemos como vai quedar e non temos moitos interlocutores, de momento”. Confirmou que “en canto se decida a conexión de Santa Clara con Barcelos, farase a conexión desta parte da praza”.
Ao respecto do tráfico, Fernández Lores aclarou que o sentido do tráfico queda en dirección San Antoniño a Rouco, pudendo saír do estacionamento ben cara Rouco (pola saída da parte alta da praza), ou ben cara San Antoniño (pola parte baixa da praza).