Miguel Anxo Fernández Lores compartiu conversa coa clase de 6º A, falando das vacacións, da ilusión que teñen por volver ás aulas e das súas aspiracións futuras
O alcalde, Miguel Anxo Fernández Lores, acompañado do edil de Educación, Demetrio Gómez; visitou o CEP Campolongo na xornada inaugural do curso escolar que este luns, 11 de setembro, deu comezo en todo o municipio.
Sorrisos, reencontros e algunha que outra bágoa se conxugaron na porta do centro escolar pontevedrés, con ducias de nenos que hoxe, por vez primeira atravesaban as súas portas. Porén, o rexedor visitou ao alumnado máis veterano, de sexto, concretamente de 6º A, co fin de preguntarlles polas súas vacacións e ver que plans de futuro teñen.
Algúns queren ser atletas, outras astrónomas e algún soña con mesmo montar unha empresa. Sexa como for, todos amosaron ilusión por xuntarse de novo e por seguir medrando xuntos, aprendendo a través das ensinanzas das súas mestras.
Doutra banda, en declaracións aos medios presentes, Lores lembrou que o Concello continúa co labor firme de mantemento dos colexios do municipio, a través dun contrato anual que chega aos 200.000 euros, dividido en dous lotes de actuacións, seguindo as demandas de cada centro. «Temos todo o que precisan recollido a través dos servizos técnicos e na medida do posíbel van saíndo adiante», sinalou. «Fixéronse as obras prioritarias para o comezo do curso e logo seguiremos actuando ao longo do curso no que sexa necesario».