O Concello inicia nesta semana a achega de area de máxima calidade, a limpeza de algas da zona de baño, a mellora da zona verde onde se instalarán baños a partir do 9 de xuño, cando abrirá “oficialmente” a praia.
O Concello de Pontevedra, a través da Concellaría de coordinación do rural que dirixe Alberto Oubiña, inicia na vindeira semana o acondicionamento da Xunqueira de Ponte Sampaio e a praia fluvial do río Verduxo para que a veciñanza e os visitantes poidan gozar dela nos vindeiros meses de verán. A intervención será de carácter integral tanto no espazo verde como no areal, que disporán de todos os servizos públicos necesarios.
Os primeiros labores comezarán coa achega de area á praia. Será de máxima calidade respectuosa cos bancos marisqueiros, e irá acompañada dunha limpeza de algas en toda a zona de baño na desembocadura do Verduxo.
A continuación realizarase unha limpeza e mellora do espazo verde, que este ano terá un especial atractivo coa recente estreada zona infantil. Ademais tamén se instalarán baños públicos.
A intención da Concellaría é que o espazo estea totalmente acondicionado para poñelo a disposición da veciñanza a partir do 9 de xuño, antes do remate do curso escolar.
Ademais, como todos os anos, durante os meses de verán a praia disporá dun servizo de socorrismo.