Unha comisión cualificadora foi a encargada de determinar a inutilidade destes papeis, que están a ser eliminados nas dependencias municipais
Correspóndense coas plusvalías e o imposto de circulación de vehículos recollidos desde os anos 60 até mediados do 2006
Figurando como un dos principais obxectivos do mandado actual, o Concello de Pontevedra segue a procurar dar pasos cara adiante na modernización da administración. Durante o verán, foi realizada unha comisión cualificadora de documentos municipais, a primeira da súa historia, co fin de comezar a liberar espazo nas dependencias municipais, destruíndo arquivos de nulo valor fiscal, xudicial e documental. Esta semana, foron realizadas as primeiras eliminacións.
Segundo os criterios fixados pola comisión, estes documentos non teñen valor de ningunha clase, polo que a súa destrución pode ser realizada de acordo cos informes elaborados polos funcionarios do arquivo municipal. Son milleiros de folios e centos de caixas que permitirán gañar un valioso espazo nas dependencias municipais.
Os documentos que se foron eliminados, e que continuarán a ser destruídos nos vindeiros días, recollen ás plusvalías e o imposto de circulación de vehículos, os primeiros entre os anos 1961 e 1999, e os segundos entre os anos 1967 e 2004.
Cómpre lembrar que o Concello si gardará un par de expedientes como exemplo documental destas series co fin de deixar constancia da súa estética, dun xeito máis anecdótico e histórico que de utilidade xudicial ou fiscal.