- O secretario xeral para o Deporte e presidente do CSD achegouse esta mañá ata o Pavillón Municipal dos Deportes para desfrutar dos Campionatos do Mundo de Loita que se celebran na nosa cidade, acompañado da subdelegada do Goberno, Maica Larriba; o alcalde accidental e concelleiro de Deportes, Tino Fernández, e o presidente da Federación Española de Loita, Francisco Javier Iglesias
“Só teño palabras de agradecemento para Pontevedra polo que fai polo noso deporte. O deporte español está en débeda coa cidade de Pontevedra pola súa aposta decidida a prol do deporte”. Deste xeito valorou esta mañá o secretario de Estado para o Deporte e presidente do Consello Superior de Deportes (CSD), José Manuel Franco, a capacidade de organización “exemplar” amosada unha vez máis por Pontevedra para acoller os campionatos do Mundo de Loita durante estas semanas e dos que o propio Franco puido desfrutar acompañado da subdelegada do Goberno, Maica Larriba; o alcalde accidental e concelleiro de Deportes, Tino Fernández, e o presidente da Federación Española de Loita, Francisco Javier Iglesias.
Segundo subliñou o secretario de Estado, “esta é unha cidade que aposta polo deporte en xeral, nestes días toca loita e van visitar Pontevedra 1.800 persoas (de 74 países), co que iso representa non só no eido puramente deportivo senón tamén no ámbito económico e turístico”. “Non en van, tamén temos aquí o Centro Galego de Tecnificación Deportiva (CGTD), ao que o CSD, a través dos Fondos de Recuperación, lle vai achegar unha importante cantidade de cartos, concretamente máis de 2,3 millóns de euros para mellorar as súas instalacións. Eu considero que Pontevedra, dada a aposta que fai polo deporte, merece este tipo de axudas, merece organizar este tipo de campionatos, que ademais o fai de xeito brillante, e merece todo o apoio que o CSD, é dicir, o Goberno de España, está a darlle”.
Tal e como afirmou José Manuel Franco, “o CGTD conta con grandes deportistas que regalan grandes éxitos ao deporte español, en modalidades como o piragüismo, e ademais, moi preto, temos o Complexo Deportivo David Cal (no embalse do Pontillón do Castro, en Verducido)”, polo que “Pontevedra aposta polo deporte, merece as axudas que o Goberno de España lle ofrece e seguirá a ser capital do deporte para toda a vida seguramente”.
