Tras acadar unha medalla de bronce na Copa de España da disciplina celebrada no Pontillón do Castro (Verducido) o pasado mes de xuño e de colleitar unha medalla de prata na que tivo lugar recentemente en Asturias, as heroínas do dragon boat pontevedrés proseguirán esta fin de semana as súas fazañas representando a España no Campionato de Europa BCS (Breast Cancer Survivors) que acollerá a localidade catalana de Banyols. Cinco das compoñentes da embarcación conformada pola Asociación de Diagnosticad@s de Cancro de Mama (Adicam) en colaboración coa Escola de Piragüismo Cidade de Pontevedra competirán xunto con outras compañeiras de Valencia e Madrid contra botes de países como Hungría ou Suecia, sen marcarse obxectivos, pero soñando con proseguir a progresión de metais e, por que non, acadar o ouro.
Antes de iniciar o seu periplo cara a Girona, estas mulleres inspiradoras participaron esta mañá na Sala de Comisións nunha recepción do tenente de alcalde e concelleiro de Deportes, Tino Fernández, á que acudiron ataviadas coa súa flamante indumentaria de cor rosa e as novas palas patrocinadas polo Concello e na que estiveron acompañadas pola presidenta de Adicam, Olga Sotelo, e a traballadora social do colectivo María Martínez. Ademais de darlles os parabéns ás compañeiras que representarán a Pontevedra e España no Campionato de Europa, o edil socialista felicitounas “pola súa forza e ilusión e polo que representan e son espello para o resto da poboación da nosa cidade e de todo o Estado”.
“Trátase non só de facer deporte -subliñou Fernández-, senón de visibilizar os beneficios que reportan o deporte e a vida saudable… Son un exemplo que agardemos que se convertan en semente para que este tipo de iniciativas e actividades frutifiquen en Pontevedra. Hai que agradecerlle a Adicam este inmenso labor que están a facer e á Escola de Piragüismo Cidade de Pontevedra todo o seu apoio”.
Unha das compoñentes do equipo de Dragon Boat BCS, Isabel Lema, asegurou que esta escadra converteuse “nunha verdadeira familia” e animou a aquelas que non probaran esta modalidade “a que veñan e comproben con nós a mellora psicolóxica e física para a linfe e a mente de todas as persoas que están pasando ou pasaron o cancro de mama”. Tal e como sinalou, “non podemos estar máis orgullosas co resultado das competicións, xa que estamos nunha mellora constante: coas de Valencia que competiron con nós en Verducido, case acababamos de saír cando elas xa estaban na meta, e sen embargo en Asturias leváronnos só medio barco e quedaron alucinadas”. “Elas tamén van participar con nós agora en Banyoles. Fixermos un adestramento xuntas e saíu xenial, iamos todas ao mesmo ritmo e quedamos moi contentas da nosa evolución para poñernos a nivel e poder facer esta competición europea xunto con Madrid”, engadiu Lema.
“Son outra persoa. Síntome con gañas de vivir e de saír. Isto foi o mellor psicólogo que puiden ter para mellorar”
Os efectos do dragon boat sobre o estado de saúde física e mental destas mulleres son rotundos. Isabel Lema afirmou que “cando entrei non podía nin camiñar e estaba psicoloxicamente nun pozo, e agora son outra persoa, síntome con gañas de vivir e de saír e non teño palabras de agradecemento tanto para o club como para Adicam”. “Foi o mellor psicólogo que puiden ter para mellorar e por iso animo a todas aquelas que teñan medo a probar”, apuntou.
Para a súa compañeira, Isabel Millán, este equipo de dragon boat supón “un xeito de amosar que o deporte é positivo para calquera tipo de cancro, activando endorfinas, permitindo coñecer xente e saír, xa que esta enfermidade ten unha parte moi psicolóxica”. Na súa opinión, elas son “a viva imaxe de que non hai que quedar na casa, de que o cancro non é o final e de que hai moitísimas cousa que facer, aínda que esteas con tratamento de quimio, pastilla ou radio”.
Segundo explicou Raquel Juncal, o dragon boat español (composto por cinco mulleres de Pontevedra, tres de Valencia e dúas de Madrid) competirá con outras cinco embarcacións de BCS, participando o sábado 3 de setembro en tres saídas de 200 metros e o domingo noutras tres de 500 metros, entre as 14:00 e as 17:00 horas.