A boa acollida que continúa a ter o programa de compostaxe na cidade, levou a que se esgotara toda a oferta de compost dos centros comunitarios.
Na actualidade hai 103 peticións pendentes de atender á espera da nova produción.
O programa de compostaxe do Concello de Pontevedra continúa a progresión á alza e segue a ser das iniciativas mellor acollidas polos cidadáns. As últimas cifras de produción e recollida de compost nos Centros de compostaxe comunitaria revelan esa realidade e confirman a aposta clara de Pontevedra e da veciñanza pola economía circular, o futuro no tratamento dos residuos municipais.
No primeiro semestre de 2022, os Centros de compostaxe comunitaria produciron 114.700 litros de compost segundo os datos do Departamento de xestión de residuos. Todos estes litros de compost foron reutilizados cumprindo ao 100% as premisas da economía circular e, incluso, quedaron demandas sen atender por falta de compost.
Do total de litros producidos:
- 112.500 litros entregáronse a 231 particulares
- 2.200 litros entregáronse ao departamento de Medio natural municipal para o abono das hortas urbanas comunitarias.
O departamento de xestión de residuos ten na actualidade 103 peticións de solicitantes de compost en lista de agarda. Na medida do posíbel, serán atendidos nas vindeiras remesas de compost. A situación actual é substancialmente diferente a do ano pasado cando o excedente de compost obrigou a colocar grandes sacos nas proximidades dos centros de compostaxe para que a veciñanza se autoabastecese.
A importancia dos produtos de quilómetro cero, a produción propia e as novas formas de vida derivadas da pandemia son algúns dos motivos atribuíbles a este incremento da demanda de compost, un abono orgánico de altísima calidade.
É coñecido que o programa de Composteiros comunitarios municipais nace da adhesión da veciñanza dos barrios da cidade ao programa solicitando a instalación dun centro de compostaxe nas proximidades da súa vivenda. O Concello estuda a posibilidade de instalalos nas zonas nas que a presión residencial é acaída (nin moi alta nin moi baixa) para que funcione un centro destas características, ademais de dispor de espazos verdes onde instalalos.
A adhesión dos veciños e veciñas permítelle ao Departamento de xestión de residuos dispor dunha listaxe de persoas (xeralmente correspóndese a unha por familia ou vivenda) ás que ofrecerlle o compost, unha vez madurado nestes centros comunitarios. Na actualidade este programa está integrado por 1.000 persoas, ás que se lles ofrece compost como abono ecolóxico.
Todas as persoas que queiran participar do programa poderán ter máis información a través da páxina web compostaxe.pontevedra.gal
