A Concellería de Benestar Social e o colectivo Acolle desenvolverán a partir do 15 de novembro e durante dous meses uns talleres de memoria e comunicación asertiva para persoas maiores en 11 parroquias do rural e barrios de Pontevedra. Os obradoiros están orientados a persoas maiores de 60 anos que non teñen problemas de memoria vencellados a ningún tipo de demencia e terán lugar en Lérez, Marcón, Bora, A Parda, Centro Sur, Mourente, Ponte Sampaio, Tomeza, Estribela, San Roque e Salcedo.
“Trátase pois de talleres preventivos, cos que se busca que os nosos maiores poidan saír da casa, xuntarse e traballar a memoria e exercitala para mantela a maior parte do tempo posible”, explica o concelleiro de Benestar Social, Marcos Rey.
Este ano, tralo obrigado parón pola pandemia da Covid-19, levarase a cabo algunha sesión de inicio que servirá como reencontro entre os asistentes e tamén para que poidan desafogarse e contar como viviron esta complicada situación, xa que, como sinala Marcos Rey, “as reunións e contactos foron cada vez menores nesta época”. Segundo indica Rey, “trátase duns talleres moi consolidados, cuxas inscricións se xestionan directamente a través de asociacións veciñais de diferentes parroquias e barrios coas que colabora desde hai uns anos o colectivo Acolle”.
Os horarios e días de desenvolvemento dos talleres serían os seguintes:
COMEZO 15 NOVEMBRO 2021
LUGAR DÍA HORA GRUPOS
(cada grupo terá entre 15 e 20 participantes, en función do aforo da aula)
LÉREZ XOVES 19:00-20:30 1
MARCÓN LUNS 17:00-18:30 1
BORA LUNS 17:00-18:30 1
A PARDA LUNS 19:00-20:30 2
CENTRO SUR MARTES 10:30-12:00 1
LÉREZ MARTES 19:00-20:30 1
MOURENTE MARTES 17:00-18:30 1
PONTE SAMPAIO MÉRCORES 16:30-18:00 1
TOMEZA MÉRCORES 19:00-20:30 1
ESTRIBELA VENRES 17:00-18:30 1
SAN ROQUE VENRES 10:30-12:00 1
SALCEDO VENRES 18:00-19:30 1