- O edil de Deportes celebra unha recepción oficial no Concello antes da marcha de tres dos integrantes do club a Durban (Sudáfrica) para participar no International Surf Rescue Challenge
“O nivel dos deportistas do Club de Salvamento Acuático de Pontevedra SAPO é tremendo. Veñen de arrasar nos Campionatos de España de Salvamento e Socorrismo de 2019 e tres deles viaxarán a Durban (Sudáfrica) para participar no International Rescue Challenge”. Con estas verbas, pronunciadas despois dunha recepción oficial ao club no Concello de Pontevedra, destacou o concelleiro de Deportes, Tino Fernández, “as últimas xestas” acadadas polas xóvenes promesas desta entidade, entre as que se inclúe unha medalla de ouro en carreira con táboa de salvamento en categoría absoluta para José María Villaverde.
Ao acto de recepción asistiron @s deportist@s Celia Lima (nada en 2005), Uxía de Bethencourt (2004), Uxía Amoedo (2004), Sara Iglesias (2003), Anxo López (2001) e José María Villaverde (2001), que estiveron acompañados polo adestrador do SAPO, Carlos Eugenio Montero, e a súa presidenta, Carmen Calvar. Segundo subliñou o concelleiro de Deportes, “os resultados obtidos nos pasados Campionatos de España foron abraiantes: Celia Lima gañou a plata en carreira con táboa de salvamento en categoría cadete; Sara Iglesias se fixo con dous ouros en carreira con táboa de salvamento e en Oceanwoman e cunha prata en sky de salvamento en categoría xuvenil, na que José María Villaverde obtivo a prata en sky de salvamento e dous bronces en carreira con táboa e en Oceanman; Anxo López se levou un bronce en sky, e as rapazas xuvenís foron as primeiras na clasificación xeral por equipas”.
A estes resultados hai que sumarlles os catro ouros de Sara Iglesias na I Copa de España de Salvamento: carreira con táboa de salvamento, carreira con sky, nadar surf e Oceanwoman.
Tino Fernández lembrou que, a raíz destes bos resultados, xunto cos acadados nos Campionatos Galegos e nas distintas competicións e ligas autonómicas e nacionais, a Real Federación de Salvamento e Socorrismo convocou a Sara Iglesias, Anxo López e José María Villaverde para formar parte da equipa nacional que participará no International Surf Rescue Challenge entre mañá e o 4 de outubro.
Dende 1995
O SAPO é un club deportivo especializado no ensino da natación e o salvamento acuático deportivo, en tódalas súas modalidades, categorías e niveis, que organiza actividades relacionadas coa formación, o medio acuático, o deporte, o lecer e a saúde dende 1995. Aínda que os seus membros adestran en diferentes ubicacións, desenvolven a meirande parte das súas actividades nas piscinas municipais de Campolongo (onde adestran os máis pequenos, de entre 4 e 14 anos), a piscina do Centro Galego de Tecnificación Deportiva (a partires dos 14 anos), no local do Gremio de Mareantes en As Corvaceiras (para preparar probas en augas abertas na ría de Pontevedra) e en diversas praias (onde se desprazan para realizar parte da formación).