O Concello de Pontevedra iniciou hoxe os traballos de reforma da rúa Areal, en Lourizán, para mellorar a accesibilidade e mobilidade, e dar servizo a veciños e ás mariscadoras que empregan este acceso a diario para acceder á pasarela peonil sobre a autovía de Marín.
A obra ten un custe de 60.000 euros, e consistirá na pavimentación de toda a rúa dende o Santo até a autovía, e crearase un circuíto peonil para acceder á pasarela pasando polos espazos que empregan as mariscadoras para o seu traballo diario, de tal xeito que garanta unha mobilidade segura.
Estes traballos inícianse logo da Semana Santa, despois de que o Concello rematase os traballos de seguranza viaria e accesibilidade na praza dos Praceres, que só están pendentes da instalación da sinalización horizontal e vertical.
Na praza dos Praceres reordenouse o tráfico, creáronse máis prazas de estacionamento, calmado do tráfico, eliminación de barreiras arquitectónicas, e a creación dunha ruta segura para os escolares.