Pontevedra vén de pechar co Campionato de España de Triatlón, dous meses de continua programación festival, cultural e deportiva que permitiron dar un importante pulo económico á cidade e, ao tempo, consolidar o que se pode considerar como unha auténtica macrocampaña de promoción. Así o considera o concelleiro de Economía e Facenda, Raimundo González Carballo, quen fixo estas declaracións ao remate da Xunta de Goberno Local celebrada este luns.
A programación comezou o 11 de xullo coas festas de Verán e continuou, sucesivamente, coa Feira Franca e varios eventos deportivos de grande importancia, que culminaron esta fin de semana coas probas do Campionato de España de Triatlón. Esta última proba supuxo a estancia durante dous días de preto dun milleiro de persoas entre deportistas das distintas categorías e modalidades e os seus respectivos acompañantes.
Todo isto tivo unha repercusión económica moi positiva, tanto para os hosteleiros, que estes días recoñecían os altos niveis de ocupación neste mes de setembro, e a hostalería local. Algo que ten a súa importancia nunha cidade de servizos e con vocación de referenciarse como destino turístico.
Raimundo González dixo que non é momento de lembrar os balanzos das festas da Peregrina, pero esta fin de semana a cidade volveu estar ateigada co tirón popular do triatlón. Ao tempo, lembrou a aposta pioneira que o Concello de Pontevedra fixo xa o ano pasado por traer a Galicia a Volta Ciclista a España.
KIOSKO DA PRAZA DE BARCELOS
Por outra banda, a Xunta de Goberno Local aprobou hoxe a concesión da licenza urbanística para a execución da obra de mellora nos kioskos da praza de Barcelos. As obras, cun orzamento de 6.426,18 euros e un prazo de execución de seis meses, van ser executadas pola Confederación Galega de Persoas con Discapacidade (Cogami).
O Concello asinou un convenio con Cogami o pasado mes de febreiro polo que se lle outorgou a concesión de varios kioskos en diversos puntos do centro urbano, entre eles o da praza de Barcelos.
As obras consistirán nunha limpeza e optimización interior das instalacións, con substitución da carpintaría exterior.
A Xunta de Goberno Local tamén acordou a caducidade do procedemento polo que se desistía do contrato de servizos para a realización do proxecto arquitectónico do Museo da Historia na praza de Valentín García Escudero.
Finalmente, outorgáronse varias licenzas urbanísticas e quedaron informadas as solicitudes de cualificación provisional de tres veciños de Pontevedra diante do Instituto Galego da Vivenda e Solo no marco do Plan Renove, que xestiona o portelo único da oficina municipal de vivenda. O plan subvenciona obras en materia de melloras enerxéticas, medioambientais ou en materia de accesibilidade.